Lu tempu

Sprundi lu tempu
ogni matassa
sbrogghjà li gruppa
e lu filu si liscia

veni l'ura chi
lu scuru si rrassa
e mi gamburia
la menti na spera nci basta

fora di dubbi e di misteri
fora di tutti li catrichi di jeri
larga sentenza e nessuna paura
la verita si cunta da sula

destini ntroscjati e scunchjuduti
restanu straci e caggimi cernuti
casalini dill'anima a ccà sdurrupati
e pezza di cori ormai sutterrati

chi amara esistenza e chi brutta galera
a cu lu tempu nci rrivelau
tuttu pè comu mai pensava chi era ....

(Carmelo Maesano)