Bon Capud’annu

E bon capu di misi,
arret’a porta na petra vi misi.
Pronta chitarra e mandulinu,
e nu biccheri i vinu.

Giuvanni Crocè ccorda,
i strummenti i corda.
Si forma stu curteu,
est’assai u nostru preu.

Nti maru Paulu,so frati,
i chitarri su ccordati.
Vinu e spumanti,
l’aguri sunnu tanti.

P’a via Roma si vai,
so frati Filippu dda stai.
Si brinda aguri,
cu na rima pi favuri.

Ndi spetta u Strascinatu,
porti perti e ricrijatu.
A l’intrasattu na vuci ndi ntrona,
non si canta non si sona.

Sta casa è dolenti,
rispettu nci voli e si senti.
Ancora panettoni e vinu,
rrivammu nti don Larenzinu.

Giuvanni,ora partìu,
a so lligrizza ndi corpìu.
Carchi scimmia cumpari,
ma sapi comu ndav’a stari.

Lolò fora nesci,
a so tavula fila e tesci.
Maru Turi cuntentu,
a so risicedda ancora sentu.

Si nchjana i maru Peppi,
u Zzillusu brindari seppi.
Cuntinua a girata,
o Municipiu vecchju sta nuttata.

Fora tutt’u vicinatu,
Peppinu Errigu e u so casatu.
Turiolu cu nu biccheri,
na bucaletta e rimi veri.

Mandulinu e chitarra,
i so cantati ndi mbarra.
U jolli ndi spetta,
Battista sempri rispetta.

Genti a nseni fini,
a jornu parinu i matini.
Totò Calabrò brinda e canta,
a cumpagnia bella è tanta.

Panettoni e spumanti,
bon capud’annu pur’e santi.
U giubocchisi è rrussu,
tandu era u nostru lussu.

Bon capud’annu a cu pati,
a tutt’i malati.
A cu è sensa lavuru,
e stu jornu nci pari scuru.

A cu lavura sensa paga,
e nci bruscia sta piaga.
A cu stanotti lavura,
e pi nui a so cura.

A l’Italia tutta para,
terra nostra cara.
A tutti bon capud’annu,
e fora d’ogni malannu.